Gair o ddiolch a gwerthfawrogiad
Yn ystod tymor 2020/21 cafwyd maes llafur i oedolion wedi ei baratoi bob wythnos gan y Parchg Denzil John, Caerdydd. Cafwyd 54 gwers ganddo’n ein cyflwyno i rai o gymeriadau mwyaf cyfarwydd y Testament Newydd.

Yn ogystal â darparu gwers wythnosol a ymddangosodd yn y papurau enwadol, fe aeth ati yn ogystal i gyflwyno ffilm o bob un wers, ac mae’r ffilmiau hynny i’w gweld yma ac ar YouTube.

Mawr yw ein diolch i Denzil am y ddarpariaeth gyfoethog hon. Er na fu grwpiau’n cyfarfod mewn sawl capel lle’r arferid cynnal dosbarth oedolion, gobeithiwn y bydd modd i eraill eto yn y dyfodol droi at y deunydd hwn. Mae’n ddelfrydol fel deunydd trafod mewn seiat neu astudiaeth Feiblaidd.

Bydd yr adnodd yma yn parhau i fod ar gael a gellid cael mynediad iddo drwy sgrolio i lawr ar y dudalen hon at y blwch ‘Cymeriadau’r Testament Newydd – Maes Llafur 2020/21’

Arweiniad gan gyfrolau newydd Gareth Lloyd Jones
O fis Medi 2022 ymlaen, bydd y maes yn seiliedig ar y gyfrol Dehongli Bywyd a Gwaith Abraham, gan ddilyn y llyfr cyntaf mewn cyfres newydd gan yr Athro Gareth Lloyd Jones, sy’n ddilyniant i gyfres boblogaidd Elfed ap Nefydd Roberts, ‘Dehongli …’ ar y Testament Newydd.

Byddwn yn troi i gyfeiriad Abraham yn gyntaf, ac yna, yn 2023, yn astudio’i ail gyfrol yn y gyfres, sef Dehongli Bywyd a Gwaith Esther a Jona, cyn gorffen gyda Dehongli Bywyd a Gwaith Moses.

Yn ychwanegol at y cyfrolau hyn, fe fydd yna gyflwyniad byr i’r wers ac ambell sylw perthnasol a chyfoes yn cael eu cynnwys o fewn tudalennau’r papurau enwadol. Am 2022/23 mi fydd y gwersi hyn yn cael eu paratoi yn wythnosol ar gyfer y Cennad a’r Tyst gan y Parchedig Meirion Morris, Llandysul.

Mae’r llyfr ar gael yn eich siop lyfrau lleol neu mae modd ei brynu fel PDF digidol yma.

Cymeriadau’r Testament Newydd
Mae’r myfyrdodau hyn wedi cael eu paratoi gan y Parch Denzil John, gweinidog ffyddlon Eglwys y Tabernacl yng Nghaerdydd. Dyma’r gwersi sydd wedi eu cyhoeddi fel rhan o’r gyfres: